Kommune Kujalleq - Kommuneplan 2011-2022
Postboks 514  3920 Qaqortoq  Grønland  Telefon: +299 704 100  www.kujalleq.gl  arealadm@kujalleq.gl
Takorluukkat aaqqissuussaanerullu ilusissaaAnguniakkat Illoqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Aammassivik


Ammassivik Alluitsup kangerluata kangiata tungaani ippoq.

Nunaqarfik 1889-imi inoqaleqqaarpoq oqaluffillu atuarfiutigisoq qatanngutigiinnianit 1899-imi sananeqarluni. Nunaqarfilli aatsaat 1922-imi niuertoruseqarfinngorpoq. Nunaqarfik ukiorpassuarni savaateqarnermut qanittuusimavoq nunaqarfiullu qeqqani narsaaterujussuaqarluni siornagut savaateqarfiusimagami.

Ammassivik ullumikkut 67-inik inoqarpoq.

Ammassivimmut ungasinngitsumi ipput savaateqarfiit Qallimiut 15-inik inulik kiisalu Qorlortorsuaq 13-inik inulik. Kingulleq nunatsinni annerpaamik qorlortorsuaqarpoq innaallagissiorfiusimasumik.

 

Inuit illoqarnerlu

1990-imiilli inuit ikiliartuinnarsimapput. 2005-2010-imi inuit 70-it missaanniillutik aalaakaasimapput. Nunaqarfimmi pisortat sullissinerat naammattutut isigineqarpoq piffissallu pilersaarusiorfiusup ingerlanerani allilerinissaq atorunnaarsitsinissarluuniit naatsorsuutigineqarani.

 

Inui agguaqatigiissillugu 39-inik ukioqarput, taamalu utoqqaangaatsiarlutik. 2009-imi nunaqarfiup inuisa 21%-ii 14-it inorlugit ukioqarput.

Ammassivimmi illut tamarmik ilaqutariinnut ataasiakkaanoortuupput kiisalu utoqqaat illoqarluni. Illut pitsaavallaanngillat inoqanngitsullu amerlakulullutik, taamaammat ajornersaasa piiarneqarnissaat suliassani salliutinneqarpoq. Illut arlaannaalluunniit kuuffeqanngilaq.

Illut amerlanerit innaallagiaqarput imeqaratilli. Illut ataasiakkaat imermut aqqusersugaapput tankeqarlutik imertartarfimmiit sullulimmik immerneqarsinnaasunik.

Amerlanerusunik illuliortoqartariaqalernissaa naatsorsuutigineqanngilaq, kisiannilli illut aserfallassimasut piiakkallu taarserneqartariaqarput. Piffissami pilersaarusiorfiumi  illut 8-it missaasa sananeqarnissaat naatsorsuutigineqarpoq.

 

Umiarsualivik inuussutissarsiornerlu

Suliffeqarfiit pingaartumik aalisarnermut piniarnermullu attuumassuteqarput. Aammattaaq sullissinermik inuussutissarsiortoqarpoq, soorlu pisiniarfimmi, atuarfimmi kiisalu kommunip suliffiini allaffianilu.

Sissiugaq umiarsuaaqqanut assigisaanullu talittarfeqarpoq kiisalu umiatsianut puttasoqarluni. Pisariaqartitsisoqarpat amerlanerusunik talittarfiliortoqarsinnaavoq. Sissiukkamut atasumik tunisassiorfeqarpoq annermik saarullinnik pisiortortuusumik. Tunisassiorfik ingerlalluarpoq taavalu nunaqarfimmiunit savaateqarfinnillu eqqaaniittunit tunioraaviulluni.

Aalisakkerivik 1946-imili nunaqarfimmi ingerlasimavoq. Massakkut tunisassiorfiusoq qatanngutigiinnit Elias aamma Ortooraq Nielsenimit pigineqarpoq - tassa suliffeqarfimmit Asimit Aps 2009-imeersumit. Nipitsat suaannik, saarullinnik aammalu paarnanik pisiortortoqartarpoq.

Ukiuni kingullerni nunaqarfimmi nunalerineq ingerlanneqarsimanngilaq, 2010-imili nunalerinermit tunisassiulerniarluni qassiinik suliniuteqartoqarpoq kiisalu Siunnersorteqarfik Ammassivimmi savaateqarnermut pilersaarusiorsimavoq.

 
Sullissiviit
Sullissiviit nunap assingani takukkit

Atuarfiusimasoq B-1298 katersortarfittut atorneqarsinnaalerniassammat iluarsarneqarnissaa kissaatigineqarpoq.

 

Qatanngutigiinniat oqaluffiat atuarfiutigisoq 1899-imi sanaajuvoq eriagisasaallunilu.

Ammassivimmi utoqqaat illoqarpoq 1988-imi sanaajusumik sulilu atortumik. Utoqqaat illuat 6-8-inut inissaqarpoq najugaqatigiiffittullu ingerlanneqarluni, pisariaqartitsinerlu malillugu angerlarsimaffimmi ikiorteqartitsisoqartarluni. 2008-p aallartinnerani Nanortallup Kommuniani utoqqarnut tunngasutigut aaqqissuusseqqittoqarmat Ammassivimmi utoqqarnik isumaginninneq allanngortinneqarsinnaavoq.

Illut ilaanni nunaqarfimmi allaffeqarpoq. Allaffimmioqarpoq ulluinnarni suliasanik isumaginnittuusumik. Nunaqarfiup allaffiata allineqarnissaanik pilersaaruteqartoqanngilaq.

 

Illu sullivik, nunaqarfiup allaffia aammalu qatserisarfik illumi ataatsimiipput. Piffissami pilersaaruteqarfiusumi alliliinissamik pilersaaruteqartoqanngilaq.

Ammassivimmi kommunip atuarfiani atuartut nunaqarfimmiuupput savaateqarfinnillu eqqaaneersuullutik. Atuarfik 1.-7. klassinik atuartoqarpoq ukiumilu atuarfiusumi 2007/2008-imi arfineq-pingasunik atuartoqarluni. Piffissami pilersaarusiorfiusumi atuartut amerliartussangatinneqarput, atuarfiulli allisariaqalernissaa naatsorsuutigineqarani.

Nunaqarfik nammineq pisiniarfeqarpoq ulluinnarni pisariaqartitanik nioqquteqartuusumik.

Nunaqarfiup sannavia nunaqarfimmiut umiatsianik iluarsaassivigisinnaavaat. Piffissap pilersaarusiorfiusup ingerlanerani sannavik nutarterneqassaaq.

 

Ammassivimmi atortorissaaruteqarfiit
Teknikkikkut atortorissaarut nunap assingani takukkit

Nunaqarfiup kippasissuani innaallagissiorfiit marluk ipput. Innaallagissiorfik nutaaq nunaqarfimmut innaallagissamik pilersuisuusoq kiisalu innaallagissiorfitoqaq sillimmataasoq. Piffssap pilersaarusiorfiusup ingerlanerani alliliinissamik pilersaaruteqartoqanngilaq.

Nunaqarfik tatsimi 600 meterinik kujasinnerusumiittumiit imeqarpoq, tassanngalu imeq imertartarfinnut aqqusersugaalluni. Ammassivimmi imermik saliiveqanngilaq imertartarfik siulleq pumperivittut atorneqarmat. Tasermi imeqarfiusumi marlunnik saputeqarpoq naammattumik imeqartitsiniartuusumik taamalu nunaqarfimmut imermik pilersuinermik aalaakaatitsisuusumik. Imermik pilersuineq naammappoq.

 

Nunaqarfiup kangiatungaaniippoq qulimiguulinnut mittarfik nunaqarfimmut aalajangersimasumik angallassisarnermi atorneqartartoq. Mittarfiup eqqaani illuaraliortoqarnissaa nunaqarfimmiunit kissaatigineqarpoq. 

Kangia-tungaani aamma ipput nalunaarasuarnermi atortorissaarutit mittarfittallit.

Kommuni eqqaavinnik imaarsisitsisarpoq. Eqqagassat ikuallaaviliaanneqartarput taavalu arsakut ikumasinnaanngitsullu matoorunneqartarlutik. Eqqagassat anartarfiillu puusiartakui ikuallaavimmi ikuallanneqartarput. Anartarfiit puusiartaat katersorneqartarput imaallu salinneqaratik kuineqartarlutik. Imikoorutit salinneqaratik nunamut kuutsinneqartarput immamullu kussiorneqartarlutik. Piffissap pilersaarusiorfiusup ingerlanerani pisortat aaqqissugaannik kuuffilersuisoqarnissaa naatsorsuutigineqanngilaq.

Arsaattarfik Ammassiviup avannannguaniippoq.

 

Iliveqarfik nunaqarfiup kujataani ippoq. Pisariaqartitsineq malillugu iliveqarfik kangimut kimmut allineqartarpoq.

Ammassivimmi aqqusineqarpoq aqqusineeraqarlunilu. Aqquserngit ujaraaqqanik sanaajupput kommunip aningaasaatai atorlugit suliaallutik. Aserfallatsaaliinermut aningaasartuutit kommunimit akilerneqartarput.

Qulimiguulinnut mittarfik, orsussaasivik imeqarfillu innimigisassanik killiligaapput ataqqineqartussaasunik. Nalunaarasuartaateqarfik asserneqartussaangitsunik killiligisaqarpoq mianerisassaasunik, kiisalu eqqaavik ikuallaavillu illunut qaninnernut naammattumik ungasissuseqartussaapput.

 

Nunaqarfiup ineriartortinneqarnerani periusissaq

Illunik ingutserisoqartariaqaqaaq. Illut B-234A, B-234b, B-565, B-569, B-600, B-601, B-903 kiisalu B-905 ajungaaramik ingutsertariaqaraluarput, illulli allat, aamma atuarfiusimasoq, nutarterneqareerlutik atoqqinneqarsinnaapput. Illut atareersut akornanni imaluunniit ingutsikkat nalaanni nutaanik illuliortoqarsinnaavoq.

 

B-180-ip saavani pinnguartarfiliortoqarnissaa nunaqqatigiinnit kissaatigineqarpoq, iliveqarfilu alliffissaqartinneqassalluni. Ukiut tallimat ingerlaneranni iliveqarfik allisariaqalissangatinneqarpoq. Nunaqarfiup qeqqani narsaataasimasoq sanaartorfigineqassanngilaq, kisiannili sunut kikkunnit tamanit atugassanut imaluunniit inuussutissarsiornermut atugassanngortinneqarsinnaalluni.

Nunaqarfimmi inuussutissarsiornikkut ineriartorneq annermik piniarnermut aalisarnermullu kiisalu umiarsuliavimmi tunisassiornermut attuumassuteqarpoq kiisalu nunalerinermut soorlu naatitanik tunisassiornermut (katorfilit) aammalu savaateqarnermut attuumassuteqarluni.


>

Ammasivik