Kommune Kujalleq - Kommuneplan 2011-2022
Postboks 514  3920 Qaqortoq  Grønland  Telefon: +299 704 100  www.kujalleq.gl  arealadm@kujalleq.gl
Takorluukkat aaqqissuussaanerullu ilusissaa AnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Inissat


Illuatungaatigut kujataani illoqarfiit nunaqarfiillu kajungernaqisunik illuliortiterfissaqarput taamaaqataanillu illoqarfinni nunaqarfinnilu inigisat mikisuupput pitsaasuunatillu. Aamma ajornartorsiutit inissiarsuit pissutigalugit pilersimasut aaqqinniartariaqarput. Siunissami pisariaqartitat, tassa ineqartut avatangiisillu eqqarsaatigalugit, pissarsiarineqarnissaat siunertaralugu inissiaatit avatangiisillu (pinnguartarfiit, pisuinnaat aqquserngi allallu) qanoq ineriartortinneqarnissaannut kommunimut pilersaarummi tunngavissiortoqartariaqarpoq.

 

Namminersornerullutik Oqartussat kommunillu ulloq manna tikillugu nutaanik inissialiortuusarsimapput, siunissamili namminersorluni inissiaatit kiisalu namminersortut pisortallu ataatsimoorlutik aningaasalersugaat siunissami amerliartuinnarnissaat naatsorsuutigisariaqarpoq. Taamaammallu Qaqortumi sanaartorfigissaaneq annertooq namminersortunit ingerlanneqartoq siulleq 2009-imi aallartinneqarpoq.

 

Anguniakkat:

  • inissianik nutarterineq nutaaliornerlu aqqutigalugit innuttaasut naammaginartumik angissusilinnik, pitsaassusilinnik pisariaqartitanullu assigiinngitsunut naleqquttumik inissaqarnissaat qularnaarneqassaaq.

  • illoqarfinni nunaqarfinnilu utoqqarnut innarluutilinnullu naleqquttunik inissialiortoqassasoq

  • pitsaasunik ilinniartunut inissaqartitsinikkut ilinniartut ilinniarnerminni toqqammavissaannik pitsaanerpaanik sanaartortoqassasoq.

  • inissiat illoqarfimmi avatangiisinut tamarmiusunut naleqquttuunissaat siunertarlaugu inissiat ilusilersugaaneri, kusanassusii avatangiisinullu naleqqussusii pillugit piumasaqaasiortoqassasoq.

  • aningaasalersueriaatsit inissialiortiternermik siuarsaaffiusut tapersersorneqassasut

 

 

 

Killiffik iliuutsillu

Inissialiortiterneq annermik illoqarfinni ingerlanneqarpoq, Qaqortorlu inuttusiartornerpaajullunilu illuliortiterfigineqarnerpaavoq. Ukiuni kingullerni qulini Qaqortumi inissiat ukiumut agguaqatigiissillugu 17-inik amerleriartarput, Nanortalimmi arfineq-marlunnik kiisalu Narsami sisamanik. 2010-mi Nanortalimmi Narsamilu illunik inoqanngittoqarpoq Qaqortumili utaoqqisoqarluni. 

 

Nanortalimmi illuliortiterneq annermik illoqarfiup avannaani Isafjordurip eqqaani ingerlanneqarpoq - ilaatigut uigulukuttut attartortitassat kiisalu illut ataasiakkaat, tassa kommunip namminersortullu sanatitaat sanaartorneqarlutik kiisalu Prs Benediktes Aqq-mi ilaqutariinnut ataasiakkaanut illuliortitertoqarluni. Illoqarfiup ilai taakku suli inissaqarluarput

 

Qaqortumi inissialiortiterneq annermik avannaa-tungaani A11-imi (Nuiariaq-Qummut) ingerlasimavoq, ukiunilu kingullerni tallimani inissiat 100-it sinnillit kiisalu ilaqutariinnut illuliat 12-it sananeqarsimallutik. Tamaani annikitsinnguamik suli sanaartorfissaqarpoq, amerlanerusunilli inissialiortiternissaq siunertaralugu tamatuma eqqaani nutaanik sanaartorfigissaasoqassaaq. Aammattaaq Prinsessep qaavani A5-imi ataasiakkaanik affarleriinnillu 40-nik illuliorfigineqarsinnaasumik namminersortumit ingerlanneqartumik sanaartorfigissaasoqassaaq.

 

Narsami inissialiortiterneq aamma illoqarfiup avannaatigut ingerlanneqarpoq tassaallutik uigulukuttut angisuut kiisalu illut ataasiakkaat arlaqanngitsut.

 

Nunaqarfinni illuliortiterneq kigaatsuinnaavoq. Ukiunili kingullini inissiat ... nutaat sananeqarput, ilaatigut noorartoqarnera pissutigalugu ilaatigullu illut ilaatigullu illut ullutsinnut naleqqukkunnaarsimasut taarserneqartussaanerat pissutigalugu. Ukiuni kingullerni marlussunni Alluitsup Paani, Tasiusami aammalu Narsarsuarmi nutaanik illuliortitertoqarsimavoq.

  

Ukiuni kingullerni Qaqortumi mikisunnguanik initaarumallutik utaqqisut ikilisinneqarsimapput 48-inik ilinniartunut naleqquttunik inissialiornikkut. Maanna inissiat 3-4-inik initallit utaqqisoqarfiunerpaajupput, kommunillu taakku siunissami pissarsiariniarneqarnissaat kissaatigaa.

 

Sanaartorneq innuttaasut amerlassusiisa allanngoriartornerannit taamaallaat aalajangerneqarneq ajorpoq, aammali inissiat ataasiakkaat nutarterneqarnissaat pitsaassusiinillu piumasarineqartut apeqqutaasarput - inuusuttut amerliartuinnartut siusinnerusukkut namminerisaminnik initaarumasalerput kiisalu inissamik atugarissaarnissamillu pisariaqartitsineq annerulersimavoq.

 

Kommunimut pilersaarusiornermi aallaavigineqartoq tassaavoq Qaqortumi ukiumut inissianut 20-inut kiisalu Narsami Nanortalimmilu ukiumut tallimanut illuliorfissaqassasoq.

 

Tamatuma saniatigut ilinniartut inissaat kiisalu utoqqaat innarluutillillu inissaat pisariaqartinneqassapput.

 

Illoqarfinni pingasuusuni ilinniarfinnut atasunik atuartunut ilinniartunullu angerlarsimaffeqarpoq, pisariaqartitsinerli suli naammatsinneqarsimanngilaq. Nanortalimmi atuartut angerlarsimaffiat aserfallassimaqaaq ullutsinnullu naleqqukkunaarsimalluni nutarternisaalu/taarserneqarnissaalu sulissutigineqarluni. Narsami ilinniartut inaat Inuilimut atasut 2010-11-imi allilerneqarput kiisalu Qaqortumi pilersaarutigineqarpoq ukiuni aggersuni Namminersorlutik Oqartussat ilinniartunut inissanik nutaanik sanaartussasut.

 

 

Illoqarfinni pingasuni utoqqaat illui nunaqarfinnilu najugaqatigiiffiit utoqqaat sanngiinnerusut inissaanik ilaannakortumik matussusiisarput. Aammattaaq Illoqarfinni pingasunit tamani nunaqarfinnilu ataasiakkaani utoqqarnut naleqquttunik inissiaqarpoq. Utoqqarnut inissiat utoqqarnit amerlaqisunit piumaneqarunerusarmata kiisalu utoqqaat illuiniit akikinnerummata utoqqarnut inissianik amerlanerusunik sanaartornissaq pisariaqarpoq. Taamattaaq ippoq innarluutillit eqqarsatigalugit, taakku amerlanerit inissiat innarluutilinnut naleqquttut piumanerusarpaat innarluutilinnut angerlarsimaffinniit.

 

Inissianik nutarterineq nutaaliornerlu eqqornerusumik pilersaarusiorneqarsinnaaqqullugit kommunimi ineqarnermut pilersaarutivimmik suliaqartoqartariaqarpoq.


>

 

Sivinganikasia i Qaqortoq

 

Isafjordur - Nanortalik