Kommune Kujalleq - Kommuneplan 2011-2022
Postboks 514  3920 Qaqortoq  Grønland  Telefon: +299 704 100  www.kujalleq.gl  arealadm@kujalleq.gl
Takorluukkat aaqqissuussaanerullu ilusissaa AnguniakkatIlloqarfiit NunaqarfiilluAsimi nunaUani nunaminertamik qinnuteqarsinnaavutitIlloqarfiit NunaqarfiilluTusarniaanermi pilersaarusiat nutaat

Transport


ANGALLANNEQ

 

Kommunerujussuit pilersinneqarnerisigut Kujataani tamarmi angallanneq ataqatigiissoq suli pingaaruteqarnerulissaaq. Attaveqaatit kommunip nutaap ataatsimoortinneqarnerani peqataasapput taamaalillutik illoqarfiit, nunaqarfiit savaateqarfiillu imminnut iluaqutigeqatigiissinnaaqqullugit - taamalu ilinniartitaaneq, suliffissaqartitsineq, inuussutissarsiorneq takornariartitsinerlu nukittorsarneqarsinnaanngorlugit. Aamma kommunimi sumiiffinni assigiinngitsuni innuttaasut attaveqaqatigiinnerulersinnaassapput, kujataalu tamarmi avataaniit tikikkuminarnerulissalluni - tassa inuussutissarsiortunit, takornarianit imaluunniit ilaqutaasuniit ikinngutinilluunniit.

 

Aammattaaq silarsuup sinneranut naleqquttunik attaveqaateqarnissaq pingaaruteqarpoq - tassa nunatta sinneranut nunanullu allanut. Kujataani illoqarfinniit sinerissap sinneranut timmitartukkut imaatigullu aqquteqarpoq kiisalu imarpik ikaarlugu assartuisoqartarluni ilaasunillu angallassisoqartarluni.

 

Ukiuni makkunani illoqarfinni biilit amerliartuinnarmata illoqarfiit ilusilersugaaneri nutaanik piumasaqarfigineqarput: aqquserngit silinnerusut pitsaanerusullu, pisuinnaat sikkilertullu aqqutissaqarnissaat, uninngasarfiit kiisalu kikkulluunniit ilaaffigisinnaasaannik angallanneq.

 

Anguniakkat:

Kommune Kujalliup kissaatai

  • pingasoqiusamik angallanneq, tassa imaatigut, nunakkut silaannakkullu angallatigineqarsinnaasunik illoqarfiit akornanni nunaqarfiillu angallavigineqartarnerini atuiffiusoq ineriartortissallugu. 
  • ilaasunik usinillu angallassinerup - ajornanngippat ataqatigiissillugit - aalaakaasumik ingerlanneqarnissaa tapersersussallugu.
  • illoqarfinni nunaqarfinnilu umiarsualiviit aalisarnermi, assartuinermi, inunnik angallassinermi, aamma takornarialerinermi, atugassatut. aserfallatsaalissallugit ineriartortissallugillu.
  • illoqarfinni pingasuusuni aqquserngit amerliartortissallugit aserfallatsaalissallugillu.
  • aqquserngit ineriartortissallugit taamalu Narsaq, Qaqortoq Narsarsuarmi mittarfik siunissami imminnut atassusersinnaanngussallugit.
  • ajornartinnagu nunaqarfiit savaateqarfiillu imminnut atassuteqartussanngorlugit aqquserngit biilillu ingerlavissaat ineriartortissallugit.
  • Kujataani ukioq tamaat nunanut allanut toqqaannartumik timmisartut attaveqarnissaq qularnaassallugu aammalu piffissaq eqqorlugu taakkunaniit kommunimi illoqarfinnut ingerlasinnaanissaq qularnaassallugu.
  • illoqarfinni pingasuusuni suluusalinnut qulimiguulinnullu mittarfiit nunaminertassaqartinneqarnissaat qularnaassallugu.
  • illoqarfinni angallanneq isumannaallisarnerussallugu.

 

Killiffiit iliuutsillu

Kujataani nunatta sinneranisulli timmisartutigut angallanneq ukiuni kingullerni qulikkaani salliutinneqarnerpaasimavoq. Piffissami tassani Narsarsuup Mittarfia Kujataaniit nunanut allaliartunut aqquttaasimavoq kujataanilu angallannikkut pingaaruteqarsimalluni. Narsarsuup Mittarfia suli ukiorpassuarni angallannermi qitiujuarallassaaq.

 

Taamaattorli kommunip ilusaa nutaaq kiisalu Kujataani inuussutissarsiornikkut periarfissat nutaat angallannermut nutaanik piumasaqaateqarput. Taamaammat Assartuussinermi Isumalioqatigiissitanit kaammattuutigineqartutut Qaqortumi mittarfiliortoqarnissaa kommunimiit Namminersorlutillu Oqartussaniit  sulissutigineqarpoq - taannalu sananeqarpat kujataamiut amerlanerusut toqqaannarnerusumik taamalu akikinnerusumik angalasinnaalissapput.  1199meteriusumik mittarfiliortoqarsinnaanissaa kommuniimit tunngavigineqarpoq taamaalilluni nunanut allaliartarnissamut soorlu Islandimut periarfissaqarniassammat. Qaqortumi Tasersuup avannaani sumiiffissa toqqarneqarsimasoq piumasarineqartumik taassuminnga naammassinnittussaavoq, aammalu Qaqortumut aqqusineqarsinnaalluni Narsamullu aqquserngit angallatillu atorlugit aqquserneqarsinnaalluni. Mittarfik aqquserngillu piviusunngorpata Narsami mittarfiliorfissatut immikkoortitaq unitsiinnarneqarsinnaavoq.  2012-imi Naalakkersuisut Qaqortumi mittarfiliornissaq
pillugu qulaajaasitsilerput.

 

Kommune Kujallermi illoqarfiit imminnut qanilluinnartuunerat aammalu illoqarfiit nunaqarfiillu imminnut qanittunnguunerat pissutigalugu angallatit atorlugit angallanneq qulimiguullit atorlugit angalanermiit akikinnerullunilu pitsaaneruvoq. Taamaammat kujataani angallatit atorlugit inunnik angallassinerup alliartortinneqarnissaa kiisalu Kitaata sinneranut attaviit tigummiinnarneqarnissaat ineriartortinneqarnissaallu kommunimit sulissutigineqarpoq. Angallaviusinnaasut takuneqarsinnaapput uani. Umiarsuit atorlugit angallassisoqartalissappat assartuisoqartalissappallu illoqarfinni pingasuni nunaqarfinnilu umiarsuliaviit aamma pitsanngorsarneqartariaqarput. Kommunimut pilersaarut ineriartortitsinissamut periarfissanik taamaattunik imaqarpoq.

 

 

Illoqarfinni pingasuusuni umiarsualiviit illoqarfiit ineriartorneranni qitiugaluarlutik allilerneqarsinnaanerat killeqarpoq. Taamaammat kommunimut pilersaarummi aamma imarpikkoortaatinut talittarfimmik angisuummik sanaffissaq isumaliuutigineqarpoq, tassaniissinnaassappullu containererpassuit, uuliasiortunik sullissivik kiisalu attarmoortukkuutaartunik niooraavik. Umiarsualiviit pioreersut naammakkunnaarpata nutaaq taanna atorneqalersinnaavoq. Aamma sumiiffik taanna Qaqortumi nutaamik mittarfiliortoqassagaluarpat tassungalu atasunik aqquserniortoqassappat qitiusumik inissiisoqassaaq.

 

 

Pingasoqiusamik angallannermi aqquserngit periarfissat pingajoraat. Kujataani ukiorpassuit ingerlaneranni savaateqarfiit akornanni aqquserniortoqartarsimavoq annermik savaateqarfiit akornanni nunaqarfinnullu qaninnernut attaveqaataasunik. Kommunip savaatillit suleqatigalugit aqquserngit taakku ingerlaavartumik alliartortippai. Sumiiffiit pineqartut pingaartumik tassaapput Qeqertaasaq, tassanilu siunissaq ungasinnerusoq eqqarsaatigalugu Igaliku Alluitsup Paalu aqquserngit atorlugit attavilerneqarsinnaapput. Aammattaaq Narsap qeqertaasaani Qassiarsuullu eqqaani annertuumik aqquserniortoqarsimavoq. (aqquserngit titartagartaat)

 

Kommunissaaq isumaqarpoq Kujataani aqquserngit pitsaasut aamma ineriartorfissaqarluassaqisut. Ilaatigut inuussutissarsiornermik, ilinniartitaanermik suliffeqarnermillu ataqatigiinnerulersitsisinnaapput, ilaatigullu illoqarfiit avataanni ineriartortitsilersinnaalluni (aatsitassarsiorneq, savaateqarneq il.il.) kiisalu suut ornigassat tikikkuminarnerulerpata takornariartitsineq pitsanngorsarneqassalluni.

Taamaammat Qaqortup Narsallu akornanni aqquserngit ikaartatillu atorlugit attaveqalernissaq kommunimiit sulissutigineqarpoq kiisalu illoqarfinnit taakkunannga Narsarsuarmut. Kommunimut pilersaarut aqquserngit taamaattut inigisinnaasaannik titartagaagallartunik imaqarpoq, inissaallu sumiippiarnissaat toqqarneqartinnagu annerusumik misissuisoqaqqaartariaqarluni. (aqquserngit titartagartaat)

 

Inuiaqatigiinni nutaaliaasuni angallannermi pingaaruteqartut ilagaat qarasaasiat atorlugit attaveqaatit. Kujataa Islandimiit Nuummut aammalu Canadamut kaabililerneqarsimagami aalajaatsumik pitsassuarmillu qarasaasiakkut silarsuup sinneranut attaveqarpoq. Kommunip ilisimavaa internetsimut attaveqarneq illoqarfinnut, nunaqarfinnut aammalu savaateqarfinnullu ineriartoqqinnissaq eqqarsaatigalugu pingaaruteqaqimmat.


>

Heliport

 

Sarfaq Ittuk